توقيع/ فؤاد نعمان الخوري

تحيّة الى الشاعر الصديق النقيب أنطوان السبعلاني
الذي سيوقّع كتابه الجديد في دير مار الياس - انطلياس
يوم 10 آذار 2013

**
انت وعم توقّع كتابك يا نقيب،
يمكن من الصفحه ل غفي فيها الغريب،
يوقع اسم،
يسرق جسم،
... ويركض ع "مار الياس" ويبوس الصليب!
اسم الصليب عليك:
ما هدّ الزمن ايديك...
وبتكتب بعينيك،
البواشق،
وبقلبك العاشق،
وبجراس "سبعل" عم ترتّل للحبيب!
+++++

انت وعم توقّع كتابك، والدني
حولك قمار ملوّنه،
وغابة قلام مسنّنه،
وراسك جبل ما بينحني:
الّله ألّله يا دني!
...وبيروت
عم تصرخ بوجه الحوت:
ما بتهزّني!
وألّلّه...ألّله يا دني!
تذكّر رفاق عتاق،
شقّو قميص الولدنه،
وطارو متل الوراق،
وصارت سنه ترقّع سنه...
+++++

ناي القصب الموٌقّع، كتابك،
ورد الوفا ع دراج احبابك...
ويا ريت
من "سيّدة سبعل" شويّة زيت،
ترشّن ع هاك البيت
ل قضّى من غيابي ..ومن غيابك!

روحي يا "بحويتا" ع "انطلياس"
غنّي مطرحي،
بعرس الوحي،
صوتين؛
وبوّسي السيفين:
سيف النقيب وسيف مار الياس!
+++++

انت وعم توقّع كتابك، والهوا
يفرش لك بها الّليل سجّادة ورق،
رح اسهر ب "سيدني" انا وكاس العرق،
نوقّع كتاب الشوق والصحبه سوا!
+++++

فؤاد نعمان الخوري
سيدني – 24 شباط 2013