أهل السياسة/ حسن سعد حسن

من ديوان
(تقاسيم على الورق)

أهل السياسة
عجب !!
مع بعضهم
واقعين
والشعب عقله
احتار
وحالته صبحت
طين
لاعارف مين
 يصدق
ولا حتى مين
مع مين
ملعونة يا دى
 السياسة
 لعنات ليوم
الدين
زرعتى والله
 خصومة
بين الخوات
فى الدين
حتى الصحاب
 للأسف
لبعض مش
ضايقين
وطالما طبعك
كده
عايزة طباع
تعابين
واللعب صار
ملعوب
 يا عم مش
 لاعبين
وعجبى !!
**
ميت ندامة
طول ما لسه الناس بتاكل م الزبالة
وندور نلف يا محسنين هاتوم إعانة
يبقى ما تقليش الثورة بح ويالا هش
وإلا يبقى والله عا ر،وياميت ندامة
وعجبى !!