صورة وظل/ سمير احمد القط‏

مين ده اللى بيقسم فى اسمى
ويفتته حروف حروف
مين ده اللى بيقطع فى جتتى
بمشرطه ويزرعنى خوف
مين ده اللى بيسرق فرحتى
من جوا قلبى بدون مااشوف
مين ده اللى عاوزنى
فى ساقيته اطوف اطوف
مين ده اللى بيحفر سكته
وعاوزنى انام
مين ده اللى خانت دمعته
مساكين عوام
مين ده اللى غنى غنوته
تحت الركام
مين ده اللى كانت خطوته
بين اللئام
مين ده اللى زانت بهجته
لما نهش منا الحَمام
مش هو نفسه اللى نهب
واللى سرق
واللى اسال الدم
واللى قعد واللى وقف
واللى قام ...هو ده