وحشتينى/ سمير احمد القط

يامصر ياامى يانبع الندى
مفيش لغيرك حنان او ندا
 يامصر انت الامان والسلام ...
كفوفك محبة فى وسط الزحام ...
عنيكى تدوب قتيل الغرام ..
ياغنوة تجلجل قلوبنا وصدى

يامصر ياامى يانبع الندى
مفيش لغيرك حنان او ندا

يامصر رموشك تدفى الوليد ..
ياام العزايم ياام الشهيد ..
حبك فى قلبى وجو الوريد ..
.بيشهد بانى ربيب الفدا

يامصر ياامى يانبع الهدى
مفيش لغيرك حنان او ندا

يامصر انت الهلال والصليب
فى ايد محمد واخويا لبيب
تدوب الفوارق وحبك عجيب
بيشفى القلوب كأنه نَدى

يامصر ياامى يانبع الندى
مفيش لغيرك حنان او ندا

يامصر شعبك بعرقه يبان
فى شق القنال وسدك زمان
بيروى بيزرع فى وسط الغيطان
بيبنى ونفسه يطول المدى

يامصر ياامى يانبع الندى
مفيش لغيرك حنان او ندا

يامصر انت الحنان فى الربوع
فى مية وضوء وانجيل يسوع
وضله فى شجرة وساقية وسبوع
وعين بتلمع ولمه  فى غدى

يامصر ياامى يانبع الهدى
مفيش لغيرك حنان او ندا

يامصر انت النضال والجلد
بنيتى السواعد ويعطى المدد
يشيل الغمامه ..يغنى الولد
فداكى ياعمرى يااصل الهدى

يامصر ياامى يانبع الندى
مفيش لغيرك حنان او ندا

يامصر عطرك نسيم للقلوب
فى شارع وحارة وكل الدروب
يضلل فى قلعة فى وقت الغروب
ويملى الكاسات محبة لنا 

يامصر ياامى يانبع الندى
مفيش لغيرك حنان او ندا