من قلبي حزين
وف. نفسي مرار وألم وضنين
هأسف على مين.. وهعاتب مين!
مفيناش متواضع مرَّه يقول
أنا عايز اتعلم يا اهل الذوق
نفسي اعرف حاجه يا أهل الدين
الواحد منا ملوهش اتنين
مفيناش ولا واحد عقله تخين!
تسأل.. هتلاقي جواب ملايين
تسكت.. هيقولوا عليك مسكين
والزن رنين..
وكلام بقى فله وآخر طين
والناس حلويين
ودكاتره حلاوه وزين الزين
وبنحسب صح.. ونهندس صح..
دا كلام محصلش!
أساتيذ متقولش
علماء من صنف النوبلطين!!
وبتوع تشريع وسياسه ودين
ليه يا بني آدمين!
الواحد فينا ف. نفسه كبير
وف. راسه وبس العلم خطير
بتلات طلقات.. من غير حلفان
لو لفوا شمال أو أقصى يمين
مش ممكن يطلع زيه اتنين!
دا كلام متقولش!
إتشرشل مين..
وبلِيه.. يكون مين!
دا.. فاكر نفسه العم نجيب
ودا.. فاكر نفسه المستر باز
ودا.. أستاذ أحمد بن زويل
ودا .. خالنا الدكتور طه حسين
دا كلام محصلش!
أساتيذ متقولش
علماء من صنف النوبلطين
وبتوع تشريع وسياسه ودين
البيه بيقول بتكلم صح
والأسطى ( اهو ) فاهم صح الصح
ودا قال على صحبه الباشا غشيم
ودا فاهم نفسه أبو العلاليم
( ماهو ابوهُ ) العمده أبو الفدادين!
دا كلام محصلش!
أساتيذ متقولش
علماء من صنف النوبلطين
وبتوع تشريع وسياسه ودين
ودا لسطى كميل ابو دم خفيف
بيقول انا كوتش رياضي قديم
وبحب فريد.. ورياض.. وحليم
كلسومي وبسمع غربي كمان
( وهابي ) واموت ف. الشيخ وهدان
وقاريت ف. الدين
وسياسة الصين..
دا انا واد عفريت م. السمبلاوين
دا كلام محصلش!
أساتيذ متقولش
علماء من صنف النوبلطين
ودا.. أستاذ زغرت سيدنا البيه
ذاكر.. ووصل مدفعش جنيه!!
ف. الحَيِّ الشهره ( الباشا آمين )
وحضاري وبردو بيفهم دين!
كاعب الكرافته ف. عز الصيف!
و( أيديه ف. جيوبه ) تملي ظريف
بيقول طول عمري انا جد الجد
لا بجامل حد
وكمان معروف بين الحلوين
بنزاهة اليَد
دا كلام محصلش!
أساتيذ متقولش
علماء من صنف النوبلطين
ودا خالنا الحاج ( غريب سلام )
سافر من خمسه وعشرين عام
ومغالط الكل ف. خمسه كمان
قال إيه الحاج غريب سلام
بيجهز نفسه ابو ضحكه جنان
فرحان.. علشان وصل مليون
( أبو أرنب ) عشمان يبقوا اتنين!!
مُش عارف هيروح بيهم فين
يِمكن كان فاكر له عمرين!!
يا خساره يا حاج غريب سلام
ضيعت العمر تعد حطام
دا كلام محصلش!
أساتيذ متقولش
علماء من صنف النوبلطين
والأستاذ ( توتو أبو المساكين )
ف. الدوره بيصرف كام مليون
ما هو ملياردير..
راقد على كام ستين مليون!!
وف. حب المجلس كله يهون
لو عايزه يطلع شقه ( لمين )
أو خمسين ألف لكام مسكين
لازم هيجيبوا ( التليفزيون!)
ويجيبوا الواد وأبوه فرحان
( كلاكيت).. للمره العشره كمان
يدعو له بطولة العمر عشان
ماهو توتو حببنا ( أبو الملايين )!
دا كلام محصلش!
أساتيذ متقولش
علماء من صنف النوبلطين
والزن رنين
وكلام بقى فله وآخر طين
أه يا بني آدمين
والله بجد القلب حزين
لكن! أخرتها هعاتب مين
وأسف على مين
وف. نفسي مرار وألم وضنين!!!
0 comments:
إرسال تعليق