عرس الموتى/ فؤاد نعمان الخوري

ل الصبيّه اللاجئه ب بلد غير بلدها، وتزوّجت ختيار تا تعيش!

انتبهي، عقد الغبار ع الطرحه،
غبار المخيّم  والحكي!
وضلّي اضحكي
تا تخلص الفرحه،
و ب اللّيل عودي ل البكي!
+++++
انتبهي...لا تحكي مع حدا...
الختيار بركي غار؟
وبطّل يقلّن ع الغدا:
امّك...وجوقة سبع اخوه زغار!
وخلّي الصدى المبحوح
ع بلادك يروح،
يرشّ الندي ع الفارس المدبوح
عا الحاجز الطيّار:
بيّك...ل مات ب أوّل المشوار!
+++++
ختيار...شو بيهمّ؟
لو شايب وناصح،
ولو عندو فقر ب الدمّ؟
لا لا، ما عندو دمّ!
ل بيلبّس العصفور خاتم سمّ..
ل بيلفّ المصايب ب دشداشه،
وبيحبس فراشه
ب خيمة همّ!
هودي العرب:
نسوان وطبول وطرب...
ومعليش غزّه تنضرب،
ومعليش لو لبنان
صفّى شعب قرفان
مصلوب ع النسيان،
واللّي ربح فيزا..حمل حالو وهرب!
+++++
انتبهي كتير ب ليلة الدخله:
لا يكون شوب كتير
ويشوف حالو الزير،
ويقطف...متل ما بيقطف النخله!
ونامي على بساط الجرح،
وخلّي الطبول تدقّ برّا للصبح!
+++++
...ورفيقك ل يبقى ب هاك المدرسه،
يفصّل الورد وتلبسي:
روحي ل عندو ب الحلم،
وتزّوجو ب البال
وب البال جيبو طفال...
مشرّد، متلك ما نسي!
+++++
هون المخيّم والبكي
وريحة عرس موتى!
وهونيك طبل ومعركه،
وعرس وبلد خوتا...
يا رقيقة الجنحين،
نقّي عرس من بين ها العرسين!
+++++
تشرين 2012