قصة حمار/ محمد محمد على جنيدي



جوه الجنينه حمار خطير!!

قاعد على نجيله حرير

يحكي حكايته للحمير

وطراخ.. طراخ

وطراخ.. طراخ!!

طب ليه كدا!

دا كتير قوي!

مش قولتوا إني حمار غبي!

مش قادر امشي والنبي

طب أعمل ايه إيه العمل!

يمكن أكون شايل جبل!!

خفوا الحموله حبتين..

ممكن أروح على مَرتين

مش قادر امشي خطوتين

وطراخ.. طراخ

وطراخ.. طراخ!!

لازم أقف.. لما هقف

هيقدروا وهيفهموا!!

يا لهوي يا ني.. الضرب نار

جسمي بقى مولع شرار

د.العلقه دي مش من بشر!!

إنتم أكيد ف. الأصل شر..

وطراخ .. طراخ

دمي نزل!

لازم خلاص الموت وصل..

وف.لحظه شفت النور ضباب

والشيله هب على التراب

وصحيت ولما صحيت لقيت

صاحبي شتمني وقال ياريت

يا ابن الحمار ما شلت زيت!

واتشال وحَط وقال كلام

هنأدبوه.. هنأدبوه!!

فجأه جري جار بيت ابوه

العالم الله جنبه جار

حاكم بأمره بتاع قرار

قادر.. وعَنده نص نقل

خفه وذوق.. وجمال وعقل!

ودقيقه واحده بقيت لفوق

ونزلت طاخ.. ومن الطراخ

مش قادر افوق

مش قادر افوق!!

وعيوني لتنين مَربطين!

ووداني محطوط فيها طين!!

وطراخ طراخ.. جرُّوني جر

دي الأرض نار مش بس حَر

وف. لحظه فَكلي الرباط

صاحبي وقال: يا ابن الحمار

حظك بقيت عشوة أسد

دا مش هزار دا الأمر جد

طليت لقيت احنا الحمير

طابور طويل..

خايفين وسامعين صوت زئير

فعلا هنا بيت الأسد!

والأمر مش تخويف دا جد!!

بقى بعد صبري على البلا

من غير ما سبب مشكله

أخرتها اكون عشوة أسد!!

وامّا لقيتني ف. حيطه سد

ومفيش فرار

والموت أكيد بقى شيء لابد!

قلتله شوف....

يا صاحب العمر التقيل

إنتوا البشر واحنا الحمير

احلف معايا بميت يَمِين

احلف بصدق بأي دين

مين اللي طاع.. مين عاش أمين

مين فينا مين.. يا صاحبي مين!

مين للأمانة اختار وخان

مين كان أصيل مين كان جبان!!

مين اللي شال شلته بأمان

متقولي مين يا إنس مين!

مين خلّى دم المحتاجين

يجري على مر السنين..

على كل حال مفيش مجال

غير إني أقولك باختصار

ربي حكم لي وكان قرار

ورضيت بحظي أكون حمار

لا ف.يوم أذيت جاري ونويت

أحرق وادمر ألف بيت!

آكل واخويا من عودين

راضيين ما بنا ومرتاحين

لا حسدت دا ونافقت دا

وأكلت من مال دا ودا!!

لا حكمت ظلم.. وسقيت دا سم

ولا قلت مره أكون مهم

لا طويت بلاد وبقيت ف. واد

وسخرت من حال العباد!

آخر الكلام قبل الرحيل

يا صاحب العمر التقيل

عارف صحيح مخلوق حمار

ورضيت أعيش بنكم حمار

وهموت حمار

بس احنا أولاد الحمير

ملناش نخش معاكوا نار

ملناش نخش مْعاكوا نار!!

CONVERSATION

0 comments: