حقنة هطل فى الوريد/ د. ماهر حبيب

صحينا الصبح على روشتة الحاج محمود إللى بتموت الدود وقد تحول الدكتور مرسى لطبيب يصف لنا روشتة  الشفاء من خطف الجنود  وعلى جميع الشعب المصرى بجميع طوائفه ما عدا أهله وعشيرته أن يواظبوا على تلك الوصفة حتى تنتهى مدة أول رئيس منتخب وإن شاء الله بالهنا والشفا والروشتة الموصوفة هى كالأتى

حقنة هطل فى الوريد كل 12 ساعة

حقنة إستكراد ممتدة المفعول بالعضل كل شهر

قرص مدر للعبط على الريق يوميا

قرص إستهبال بعد كل أكله 3 مرات فى اليوم

لبوس إستعباط 3 مرات يوميا

دهان موضعى لإزالة حكة التفكير عند اللزوم ( كل ما تفكر حط الكريم على طول )

قرص مخدر للمشاعر والأحاسيس الوطنية كل ساعة

3 أقراص مهضم للكرامة لغاية كرامتك ما تبطل تنقح عليك

قياس نسبة العبط فى دمك مع الحفاظ على نسبة العبط بين 90 و 100% وفى حالة هبوط العبط توجه لأقرب مستشفى للإخوان لإعطاءك حقنة عبط فى الوريد والتأكد من عودة النسبة للمعدل الطبيعى

طبعا كلنا لازم نمشى على الوصفة دى لأنها الحل الوحيد بعد إنتهاء سيرك خطف الجنود الذى إنتهى بالتفاوض أو التراضى أو صدور الأوامر من المقطم بإنهاء المسخرة علشان الجيش يبقى خسر الجلد والسقط

لازم تصدقوا الرئيس إنه ما كانش قصده  إنه يحرج الجيش

لازم تصدقوا إن حكمة الرئيس مرسى أنهت الأزمة دون إراقة دماء

لازم تصدقوا إن الرئيس مرسى حافظ على دماء المخطوفين وعاقب الخاطفين عقابا شديدا بأنه حرمهم من الذهاب للجنة علشان لو الجيش كان قتلهم كان زمانهم ينعمون بالجنة وهذا أشد عقاب للخاطفين

لازم نصدق مرسى إنه ما كانش يقصد الجيش لأنكم عارفين إن واحد أكتر من ستة ولذلك كان كل الحمل محطوط ع الجيش علشان مخطوف منه واحد فى حين إن الداخلية مخطوف منها ستة

لازم تصدقوا إن وزير داخلية مرسى يحافظ على أمن مصر من الجبهة الشرقية وشوفنا وحوش الداخلية إللى بياكلوا الظلط وشفنا عضلات كل جندى أمن مركزى وهو لو نفخ فى جبل حا يجيب عاليه واطيه وشفنا عساكر الأمن المركزى وعضلاتها المفتولة علشان تقدر تشيل السلاح وهو عبارة عن نبلة بأستك رفيع

حاولوا يا جماعة تصدقوا إللى بيقولوه فى التليفيزيون المصرى الرسمى ولو لقيتوا مقاومة واظبوا على الروشتة إللى فوق وبالهنا والشفا وما تنسوش إنكم تستمروا على حقنة الهطل فى الوريد وأقراص الإستهبال ولبوس الإستعباط ومخدر الأحاسيس وإنتو حا تخفوا وتبقوا زى الفل وربنا يديم علينا نعمة النسيان وبالهنا والشفا