شو بيعملو البيوت لولا غاب
خيال الشمس، وتيتّمو البواب؟
بتبعت العتبه ايدها ل برّا
تشحد هوا من رفيقها المزراب...
وكانون بكرا بيفلش الصرّه
وبيعلّق مرايه ب كتف الغياب؛
وما في حدا بيمرق ت يتمرّى:
بيوت اللّي مالها صحاب..مالها صحاب!
+++++
يا بيوت مسبحتي انا مسافر:
الجوع كافر.. والسفر كافر!
قلب الفراري، بلبل الغابات
بيخاف من عسكر ب المخافر...
وكلما حدا تهجّر، تكسّر، مات
يصرخ: ولووّ... نسيت يا غافر؟
والبيت يمحي بيت، والنهدات
غابات ما فيها درب حافر!
+++++
عمّرت بيت الشّعر، وجّعني!
بتقول: نعمه الشعر أو لعنه؟
مين الّلي وشوشني (وشو كنت زغير)
حمال القلم والهمّ واتبعني!
عمّرت بيت زهور وعصافير
ب شوارع القندول ضيّعني
ويا ريت، بعد عذاب المشاوير،
عا مطرحي الأوّل بيرجّعني!
+++++
وكان الوطن بيتي، وأنا ملاّك،
عا صخر قلبي اشقع المدماك!
واللي سبق شمّ الحبق قبلي
سكّر الباب ومسمر الشبّاك...
وهبّ الهو الشرقي من القبله:
عينك ع بيت الشعر والنسّاك...
وبيوت زور ورقص ع الحبله
انطرني ت اهدمهن انا ويّاك!
+++++
وبيوت... ترتيلة حجر منحوت
ب عيون اخوتنا واهالينا؛
وبيوت ب الغربه ضجر وسكوت
مش سامعه ب رقّة ليالينا...
يا صاحبي الطيّب، قبل ما نموت
ع بساط ريح الحلم ودّينا...
لا تقول: نحنا ساكنين بيوت،
البيوت هيّي الساكنه فينا!
+++++
0 comments:
إرسال تعليق