بعد اليوم الطويل
والتهويل والتعليل
والصراخ والتهليل
قلت أدخل أنام شوية
أريح مخى وعينيا
ولاقيتها مستنيانى
وفى حضنها واخدانى
عنها ومسكت ودانى
قلت يا ستى سيبينى
أنا تعبانة إرحمينى
قالت لى ودى تيجى
عن يومك لازم تحكيلى
وتعيدى وتقوليلى
عايزة تعرفى إيه بس
اليوم زى اللى قبله
وماحدش بينا حس
قعدت تزيد وترط
وتشيل من هنا وتحط
وكلامها كان كتير
أنا قلت ما بدهاش
أصلها مش هتسيبنى
وبرده
ما ينفعش ما حكيلهاش
دى هى اللى ليا
وهى اللى حاسة بيا
وخلاص
طار النوم من عينيا
خدى عندك ... وإبتدينا
فى الكلام لما إستوينا
وحكيت عنك كتير
سهرت معايا المواويل
ودى طقطوقة
ودى أغنية
وهو كدة لما للصبحية
وسمعنا آذان الفجر
قمت أصلى ... ودعيت
وإتمنيت
على الله إتمنيت
بكره ييجى ويلاقينى
تغمض فى وجودك عينى
وفى حضنك إنت أعيش
وأسيب القطن والريش
وتكون حكاياتى ليك
بالهمس .... بالوشوييييييييييش
ورجعت للسرير
لاقيتها نامت
وسألت روحى
ياترى تعبت .... وألالا فى كلامى هامت
يا ترى نامت صحيح ... ولا بتحلم بيك
ماهو لازم
من كتر كلامى عنك
وطول غرامى ليك
أكيد حبيبى أكيد
لازم تحب عينيك
لازم تفكر فيك
لازم تهيم فى وجودك
لازم تحن إليك
لازم حبيبى تعشق تكون يوم بين إيديك
و فقت من السرحان
وإستغفرت الرحمن
وقلت فى إستغراب
الشك وصل للمخدة كمان
والغيرة ....
ده مابقاش فيه أمان
والله دى بقت حيرة
لالالالالالالالالالالا
إحنا لازم ننام
نريح ونرتاح من الكلام
والأفكار الكتير .... والأحلام
تصبحى على خير يا مخدتى
يا مونسانى فى وحدتى
وأمانة عليكى بكرة
لما يئون الأوان
وآجي فى حضنك أنام
ماتسألينى سؤال
على اللى جرى واللى كان
0 comments:
إرسال تعليق