سألت شيخ الطريقة
قوللي يا شيخنا
إيه المفروض يتعمل فى دنيتنا
أنا ما عملتهوش؟
العلم اللي فاتني ولا اتعلمتوش؟
الصبر المر اللي أنا مصبرتوش
الباب اللي لسه ما طرقتهوش
*****
شفت بعنيه فى مكاني هفيه
وأنا رافعة إديا للسما بِغية
لأنول نصيبي اللي ما نولتهوش
والمومسات موالى العروش
ما تقولش إسعي ولا روحي وكافحي
ده زمن المقايضة
والثمن إنت ليا ما ترضاهوش
*****
يا شيخنا سعينا جاهدنا وجرينا
وغيرنا سبقنا غافلنا وسرقنا
في سريره نام وحظه قام
*****
يا شيخنا صديقنا بيمر بطريقنا
كأنه ما شافنا ولا يوم لمحنا
وبتجرى السنين
*****
بتقولى إسمه إيه؟
أيوه....افتكرت
ده إسمه النصيب
نصيبنا يصيبنا ونعمل راضيين
إزاااي بس نرضى
فى الدنيا يا شيخنا وم الهم شيخنا
ولا إحنا فاهمين
*****
غير كسرة قلوبنا
من كتر ما صابنا
بالحكمة تفيدنا
ونعرف صوابنا
ونقول فى مادنه
قسمتنا ونصيبنا
*****
اللعبة سخيفة
في دنيا مخيفة
الغلابة اللي فيها
مش لاعبين
*****
جاوبني يا شيخنا
إيه العمل
في ضياع الأمل
والعمر اللي إتبدل
بذكري السنين
العمر إتسرق
فوق حبة ورق
وقالوا تعليم
*****
م ترد يا شيخنا
ساكت لحسرة ندم
واللا من فرط الألم
واللا هتقول تمييز
مش هاقول أنا قبطي
ولديني حرموني
وحياتك مسلم
وفي جهدي ظلموني
وحقى سلبوني
بأبويا شتموني
أنا مصري يا شيخنا
لا فتنة ولا فتة
ده كله بياكل أتة
*****
فين خيرك يا م ص ر؟
طب فين العدالة
وخانة الديانة
دي خيانة أمانة
في زمن المهانة
*****
راح ارضى يا شيخنا
ونار عقلي تبرد
وتصبح رماد
إيه رأيك يا شيخنا
اسيبك تنام
وانا رايحه أحلم
على جناح يمام
بأمن يسودنا
وعدل وسلام
*****
يااارب
لك تبنا وأنابنا
ولأمرك سلمنا
وعليهم حسّبنا
*****
0 comments:
إرسال تعليق