(عن حلم ليله امس)
بتحب الشباك البحري
تسند راسها علي ايدها
وبتسرح في حدود الشارع
وشارعنا
كان شارع ضيق
مش متهيئ للسرحان
ولا فيه مزارع ولا بستان
بس ساعات كانت
بتقول
ان زمان النيل كان اقرب
وان شارعنا
اصله حقول
بس الحمد الله
لسه الشباك هو اه
وهواه بيرد الروح
ساعه مطروح
لزمان
وزمان يابني
ياما يجبني ويوديني
ويخليني احس باني
بنت بنوت
لسه بتحلم
بالبسكوت
وبتلعب وبتجري وتضحك
وبتبني عالشط بيوت
بس الحمد الله
لسه
الشباك هو اه
وهواه بيرد الروح
تعرف اني
كنت زمان
مش لابسه
الطرحه
كنت باصلي
بس تملي كنت
بروح لماريا وفرحه
اصل الجيره محبه
وسيره
ياما حكيت
مع ابله سميره
بس الدنيا بتلهي الناس
اما الشارع لساه جامع
صوت الجامع والقداس
والشباك اهوه زي
ماهوه
الشيش المتوارب ضله
كنت بحط زمان القله
وفيها مورد
تروي وتسري تبل الريق
واسمع صوت الشيخ صديق
هب تلاقي الدنيا بتصفي
وفي لحظه يتفك الضيق
بس الحمد الله
لسه الشباك هو اه
وهواه بيرد الروح
وحياتي كانت في حدوده
رغم سدوده
رغم بيوته
رغم سكوته
يا ما سرحت
في ليل ملكوته
يا ما بكيتله
يا ما دعيت
وحكيت وشكيت
الشباك ده
فيه حواديت
عمر بحاله
جوه البيت
بس الحمد الله
لسه الشباك هو اه
وهواه بيرد الروح
البرازيل 2010
0 comments:
إرسال تعليق