الدين بيسامح/ عصام ملكي

قتلو "سفير" ومطرحو ترمَّد
وبالرغم انو الشر متعمَّد
القام القيامه وعم يهد صروح
انسمحت ظروفو لعند الله يروح
كيف بدُّو يواجه "محمد"

يا ها السما قدَّام عينيكي
ليكي شو عملو عا الارض ليكي
وين الوعي بالناس والقانون
سلمي ضروري الاعتراض يكون
صلبو "المسيح" وما انعمل هيكي

هزُّو هراوي وبالغضب جولو
وخلّو الزمان يغيِّر فصولو
لا مرحبا قولو ولا كيف الحال
مش هيك "بالانجيل" عم ينقال
ومش هيك "بالقرآن" بيقولو

"القرآن" منها هيك آياتو
هاتو حجج من عندكم هاتو
منقول نحنا سامح الجاني
انضربك عا خدَّك قدِّم التاني
لا تحاسب المجنون عا خواتو

"رب الخلقنا" كلنا عبدنا
لكن ما شفنا دين وحدنا
وقت الصلا عم تكتر الزحمه
من الرب بدنا نطلب الرحمه
ونحنا تا نرحم ليش ما بدنا