الى قداسة الحبر الأعظم/ فؤاد نعمان الخوري

مبارك يا ها ل جايي ب اسم الربّ
عا أرض ايد الربّ غمرتها؛
مبارك يا ها ل جايي ب اسم الحبّ
عا  بلاد شمس الحبّ هجرتها...
يا ملتقى مجد الشرق والغرب
ب قلب المسيحيّه وحضارتها
هنيّال يلّلي ناطرك ع الدرب،
وتلّة حريصا و عيد زهرتها!
+++++

أوّل ما تدعس عا أرض لبنان
ويتحوّل تراب الدرب بخور،
وتصير قامات الشجر صلبان
تفرش طريقك ب العطر والنّور..
صلّي ع نيّة شعبنا الزعلان
عا كرم سايب ما الو ناطور؛
واذكر شعب وسع الدني هشلان
مهجور بيتو والأمل مهجور!
+++++

يا سيّدي يوسف وقع ب البير
قلبك يضمّ وفكرك يداعي؛
يوسف وطن جسمو انتلى مسامير
وسرقو سلامو ولاد الافاعي...
ورغم الظلم والحقد والتزوير
جفن الكنيسه مفتّح وواعي!
وتنين صارو شمعة التنوير:
الروح القدس..والبطرك الرّاعي!
+++++

ولمّا تصلّب عا برج بيروت
والبحر يخشع والجبل يركع
مرّق عيونك عا عتم البيوت
تا يقوم يمشي الحلم المخلّع...
شبعنا حرب..دخلك ما بدنا نموت
تعبنا من القسمه، تعا نجمع
ولاد الكنيسه ب فيّة اللاهوت
..وحطّ الحرم ع الّلي ما رح يسمع!
+++++

نجمع بنشعي، الرابيه، معراب
وطيور بكفيّا يجو يغنّو؛
وتكون انت التاج والعرّاب
وخطّك ع طول الخطّ يتبنّو...
وب الشرق لو شافو حرب وخراب
لا يزقّفو كتير ولا يتهنّو:
بيجوز نترحّم على المزراب
لو حكمت الدلفه بعد منّو!
+++++

لمعة صليبك عم بتندهلي
لا تلومني لو ما قدرت ردّيت:
ها المسبحه ب ايدي، وعلى مهلي
ب السرّ رايح صوب آخر بيت...
والعمر وهله، وطارت الوهله
يا ريت تطلب لي متى صلّيت:
لمّا تجي السّاعه، متل أهلي،
غمّض عيوني ب حضن هاك البيت!
++++++

أيلول 2012