إنت الشافي/ محمد محمد علي جنيدي

ربي يا غالي
أنا مش عارف اقولك إيه
ربي انا حالي
إنت الأدرى بكل ما فيه
عايز اشكيلك كل حياتي
عايز ابكيلك مني ليلاتي
عطشان وبإيدي الكاس فاضي
مهموم والليل طال بي وراضي
جيت الدنيا بدون أحزان
وبقيت بمشيئتك إنسان
واتعلمت الخير ألوان
واتضريت من نفسي كمان
يأسي كتير يقلع أزهاري
وكتير أغرق بين أفكاري
وبتوه وانا بين أحضان داري
واما اشكيلك خوفي وألمي
تكشف كل مخاوفي وهمي
ما انا من ( كن فيكون ) بإراتك
وانا من نفخة روحك وحدك
علشان كدا أنا هفضل عايش
حاسس عار ف وكمان شايف
مهما اتأزم.. مهما اتألم
راضي عشان من قلبي مسلم
عارف لما انا بطلب عفوك
بتجود بيه وتزيدني بفضلك
إنت النور اللي ملا عيوني
وانت الشافي لكل شجوني
وانت بأمرك كانت روحي
وانت العالم سري وبوحي
وانت اللي بإيدك أحوالي
علمك سابق كل سؤالي
وانا منك وإليك يحلالي
إني اطلب من ربي الغالي
أنا محتاجلك وانت الكافي
إيدك بلسم حضنك دافي
مهما ابعد وأكون الجافي
إنت الأكرم وانت الشافي