قصيدة الشاعر أنطون سعاده في الحفل التأبيني للفنان الراحل وديع الصافي

بدعوة من

مؤسسة "إنماء الشعر العامي العربي في اوستراليا والوطن العربي 

في سيدني استراليا، 10-11- 2013

عا ربوع نيحا طلعتْ يا محبّين                  لاقي غِنايي وأترك القلّه

نيحا جبل متلو جبل صنّين                      ذات الكِبَر والمجد والطلّه

جارتي من عهد فخر الدين                     عليها دْخَلتْ، والدرب عم فـَلِّي

حامل بإيدي زنبق ونسرين                     تا رِشّ عا دْروب الزمان عْطور

وإركع عا قبر الموهبِه وصلِّي.

**

بلّشت صلِّي وبالمسابح غِل                    وبالشْبيّه تمتِم وطالِع

وإلاّ بشوف مْلاك عم بيطلّ                    رَيَّح ضميري وحَسَّن الطالِع

وقبل ما عليّي بإيدو يدلّ                       قلت: شاعر في إلي مْطالِع

جايي تا صَلّي للوديع وجِلّ                    لا بَهورات ولا خلِق طالِع

قلّي: وديع بالقبر دشّر ظِلّ                     مبارح يا إبني من المسا وْطالِع

سمعت منّو وقال بدّو يفِلّ                      رايح يزور النبي أيّوب

وآخر الجمعة عالسما طالِع.

**

قلت: دخلـَك نصّ عمري داب             اسمحلي بشوفو وبتركَك وبروح

فيّي صفَن وتنهّد السرساب                    وقلّي: انتبه عا جرحَك المفتوح

تراب لْإجا بْيمشي بطَريق غياب             وبينتهي تْراب وحلم مدبوح

ومن أي متى كان الوديع تراب؟             ما كلّ عمرو صوت يحْكي الروح.

**

صوت يحكي الروح تا نرتاح              صوت يحكي الروح يـِغْني بيوت

صوت يحكي الروح بالأفراح                صوت يحكي الروح يـِهْدي قُوت

صوت يحكي الروح بالزيّاح                 صوت يحكي روح ما بتموت

رُوح فتّش عالم الأرواح                     عالمقبَره الأرواح ما بتفوت.

**

رجعتْ من نيحا وطلبتْ العون                 نيحا عليّي بالشعر بتمون

قطَّفت منها كلّ زهره بلون                     وزرعتْ بجْروح الجمال عيون

وعرفت كلّ الهَون بقيو هون                   لكنْ وديع الخالد الموزون

روحو وصوتو معبّيين الكون                   فيك صوتو تسمعو بكل بيت

والروح فيها بكلّ نغمه تكون.

**

تسعين عام وحامل المشعال                   إنتْ صامد والجبال تدُوخ

كبرْتْ كبرتْ بالصيت والأعمال              نَسَّر زمانَك والسنين فروخ

عندك قماشِة صوت فاضي البال              لا متلها تْحيَّك ولا منسوخ

لبَّستْ فيها مْواكب الأجيال                     لا خيطها نسَّل ولا بتبوخ.

**

يا حبّ صافي يا نبع إحساس                  يا قلب هادي بزهر لوزتنا

يا صوت عَلاّ فوق كلّ قياس                  عبّى الدني وساكن بكلمتنا

يا جْبين عمّر للشرق متراس                  يا حلم عم يسهر عا غفوتنا

يا حنجره أكبر من الإفلاس                   يا نور دوّب عتم غربتنا

مرّه طلبنا كاس يسقي الناس                  إنت وعم تْغنّي عا شاشتنا

صار الخمر يرقص بقلب الكاس              ويخاصر الفرحه بْسهرتنا.

**

حملنا هويّه مجدْها بينباس                    دْخيرِه وهبناها محبّتنا

قدرْها بنفوسنا ما خاس                       وصوتـَك بيشبه هويّتنا

حضنتْ الوطن كلّو بفكر حسّاس             بمال الدني ما بعتْ أرزتنا

ولا فْرقت مرّه الياس عن عبّاس           ولا قبلت تقطع خيط وحدتنا

ولولا وقع صوتك على الوسواس          وخَرسَن جرسنا فوق قبّتنا

بتضلّ روحَك تخدم القدّاس                 وتدْعي العالم عا كَنيستنا.