سيبوا الإستبن يترشح/ د. ماهر حبيب

البلد مقسومة إتنين قسم نفسه البلد تمشى ومش عارف يعمل أيه وإسمه حزب الكنبة ونص تانى إسمه الإخوان عاوز البلد تخرب علشان يثبت للنص الأولانى إنه الأقوى والأقدر على الإستيلاء على الحكم والأتنين بيكسروا عظام بعض والصراع على اشده ومحدش بيفكر إزاى يوقف حلبة المصارعة دى وصراع الديوك ومحدش قادر يكسر عين التانى فالنص الأولانى نفذ صبره و النص التانى عينه تندب فيها رصاصة وار بى جى كمان.

والحل أيه ؟ أنا فى رأيي إنه نحط النصين قدام بعض ويتصارعوا بدون دماء وأن يتصارعوا على الملأ وعلى عينك يا تاجر وإللى يخسر يخرس خالص وما يفتحش بقه لغاية ما تييجى نفس الفرصة للصراع مرة أخرى والجدع يفرض إرادته على الجميع أما حكاية إن النص التانى مش عاوزينه يلعب معانا وهو عمال يفرج العالم علينا و لو مشينا على رموش عينينا مش حا نقدر ننفى عن أنفسنا تهم فاكرينها مش موجودة لكن مع تعامينا عن فضح النص التانى حا نحول المجنى عليه من النص الأولانى لمجرم جانى و نفضل ندور فى حلقة مفرغة.

دلوقتى عملنا نكسة ووكسة فى يناير وعملنا ثورة  علشان نصلح وكسة وورطة وبقى فيه نظام جديد وداخلين على إنتخابات يفترض أنها إنتخابات نزيهة نظيفة فليه زعلانين ليه إن زيد وعبيد ونطاط الحيط يدخل الإنتخابات ولو الناس إختارت أرجوز يبقى قبلنا إن الناس إختارت إنها تعيش فى سيرك ويقودها مهرج وإن إختارت معاق عقليا يبقى الناس إختارت إنها تعيش فى مستشفى المجانين وإن إختارت بطل فمعناها إن الناس عاوزه تعيش فى ظل شخص عاقل يخطط لها بالعقل مش بالجنان.

ما تسيبوا المعزول والمخلوع والمقطوع والموجوع والمفجوع وكل إللى نفسه ينزل فى الإنتخابات والجدع إللى يلم أعلى الأصوات يطلع مبارك يطلع مرسى يطلع جمال يطلع السيسي يطلع صباحى يطلع عنان يطلع الظواهرى يطلع زى ما يطلع وإللى يختاره الشعب يبقى الشعب يستاهله ولو رجع مرسى يبقى إنتوا ما تستاهلوش غيرهم ولو قدر الإخوان وأتباعهم السلفيين إنهم يحشدوا ملايين أكبر من ملايين تمرد وميدان التحرير يبقوا أحق منكم كلكم ولو عاوزين تثبتوا إن 30 يونيو كانوا 95 مليون من التسعين مليون مصرى نزلوا الميادين وإنها ما كانتش فوتو شوب إخراج خالد يوسف فلو إنتوا ضامنين إنكم أغلبية ينزل إى حد للإنتخابات وبعدها من يكسب يحكم بالعدل ومن يخسر يسكت انصاره حتى إنتخابات قادمة والقوى يحكم أما الضعيف والأقلية فلتحًكم بالعدل من الرئيس القوى ...فلينزل السيسي وينزل ضده إن شالله العفريت الأزرق والقوى يكسب ولو نزل الإستبن وكسب يبقى حلال عليه ويستاهل الشعب المصرى إللى حا يحصل له ولو فاز السيسي على الإستبن فساعتها سنكسر عين الإخوان وحا يتلموا ومش حا يبقى ليهم عين فى حاجة بس بشرط أن تكون إنتخابات نزيهة تسد بق زعيم الإرهاب عضو الإخوان حاكم أمريكا إللى نازل يخرب العالم وأخر ضحاياه أوكرانيا .....إعطوا الفرصة لمرسى إنه يشنق نفسه بحبل الإنتخابات ويندفن فى صندوق الإنتخابات