دمعة الشاعر جورج منصور في وداع خاله الراحل حنا عبيد

نهار السبت الماضي كان «الوداع الأخير» للشاعر المعروف حنا عبيد، وقد شارك في الجنازة جمهور غفير من الأقارب والأصدقاء، وبعد القداس القيت قصائد شعرية تأبيناً للفقيد الراحل ومن هذه القصائد ننشر قصيدة ابن شقيقة الراحل الشاعر جورج منصور:

يا خال موتك لبّس المنبر حداد
ودف المعنى لمين بدو يشتكي
والشعر عنبيصيح يا رب العباد
ليش انهدم آخر حجر بالمملكي
غيبوبتك كانت جمر تحت الرماد
ما عدت تسمع لا حراك ولا حكي
وما قدرت تبكي عا حبيبك بو زياد
ولا بو زياد عليك شارك بالبكي

يا حبيب الشعر ضيعانك تغيب
وتبقى الحياة بغيبتك وهم وسراب
يللي لشعري كنت ولقلبي قريب
قلبي انصلب حدك ع جلجلة العذاب
والموت ما بيطلق سهم غير ما يصيب
سهم للي صابك مهجة الشعار صاب
بيرحل حبيب بيلحقو تاني حبيب
تحمل يا قلبي قهر ع فراق الحباب

شو كان يا (حنّون) في شعرك حنين
شعرك صلا ناسك بصومعتو تقي
ما انت قايل هيك للبي الأمين
هللي بدموعو الأرض ع غيابك سقي
«يا دهر لو لمتريت اخدوك السنين
هالمن وراها بيطلع الصبح النقي
بتشوف بيي والعصايه ماشيين
وما فيك تعرف مين ع التاني لقي»


متريت غيمه بالسواد ملفلفي
نور الشمس ختيار فوق تلالها
ما صدقت انو قمرها بيختفي
ولا العندليب الغردّ وغنالها
تخمين تا تلاقيك بعدا مولفي
وتضمك وتشلح عا كتفك شالها
صارت بعد منك عجوز مقفقفي
ومتل الأرامل عنبتندب حالها

شيخ الشباب سموك ما في مغالطه
جنت صبايا الشعر بشبوبيتك
قلبك عطى ما في قلب قدو عطى
وكل العطايا قسم من حنيتك
يا ما ع درب العمر سددت الخطى
وكان الوحي كان الشعر امنيتك
وتا ما تشوف الشعر كشف بلا غطى
كانت تغطي الشعر انسانيتك

هالعيلة الربيتها شباب وبنات
عملو جنود بخدمتك سهرو كتير
وام العيال مرسملي باسمى صفات
مين العطاها الصبر غيرالله الكبير
ام يوسف من خيار الأمهات
تسهر على سريرك بالله تستجير
بكيت عليك وانت ع قيد الحياة
انت دشرت السرير وبعدها
لحد هلق راكعه حد السرير

CONVERSATION

0 comments: