صاحب الدولار/ عصام ملكي

يا زغيب حيّك ما بقا حيي
ما عملت قيمه لصاحبي وخيي
من عيلتك رح شيل حرف الزين
والنقطة اللي واقفه عا الغين
تا قول عيب عليك وشويه

نسيت العطاك كتير من ذاتو
وفوق العلى حطَّك بكلماتو
محلَّك عرفنا اليوم بالاعراب
الظاهر انت بتكّتر الاصحاب
تا تقبض عليهم اذا ماتو

منكَّ «كليم» ولا الك اسلوب
ولا عنتر زمانك ولا شيبوب
اعطيني قصيده وبقوافيها
دقة جراس وكسر ما فيها
تا قول انك ربَّها محسوب

فوق الالف بتريد عا المطلع
العندك بيبقى من «الشعر اصلع»
لا تلومنا ان قلنا بعد هل صار
«هيدا صديقو حضرة الدولار»
العا جيبتو بيفوت ما بيطلع

CONVERSATION

0 comments: