 |
| الشاعر المرحوم نبيل خوري |
بيّي
مبارح نزل شتي وصاير ينقر عالشبّاك .. فكّرتك إنت , بتذكر شو كنت تنقر عالشبّاك بصابيعك منشان إركض وإفتحلك ؟
كنت لحالي .. لاء لاء مش لحالي لحالي إنت كنت معي
بتعرف ..؟ مابدّي قلّك الشتي ذكّرني فيك لأنّي أنا بالأصل مانسيتَك
ومع إنّي مانسيتك في شاعر بيضلّ يذكّرني فيك
شاعر متلك ريشتو مابتنشف .. بيغطّها بمحبرة البحر من طاقة شمس الغروب وبيرسم
شوباك عم تنكزني .. إي إي يابيّي فهماني عليك .. بس هالشاعر غير شكل .. بحطّ كتابو عالمرايي بشوف كتابك (لون العمر ) .. بحط دينتي ع جلدة كتابو بسمع صوتك
بيّي .. إنّو إنتو الشعرا عن جدّ "خيال بالألون" لأله الشعر؟ هيك قلّي هوّي .. وأنا بصدقّك يابيّي وبصدّقو
ليك .. كنت عم إقرالو هالقطفة حبق وشمّيت ريحة غيابك:
لُو الأرض كانت
متل خابة ميّ
وتخضّ ريح الكون بالخابه
. .
لو كان سقْف اللون
قشّه فيّ
قشّه شمِس
والصوت بوّابه
..
لوكان بكرا .. وبعد بكرا
شوي
ومافي حكي
وحْروف
وكْتابه
..
كنْت بعينيكي بْعيش . . بالغابه
بيّي
إنت علّمتني عالحبّ .. الحبّ الكبير , وخلّيتني إحلم بهالمطرح الحلو .. بتعرف الحلم ماخلص .. يمكن كل شي وفي شعر متل ضحكتك الطيبه بدو يضلّ الحب يرفرف حوالينا ..يمكن الحب ملاك يمكن إنت ملاك
مش إنت القايل:
مطرح ما كان الحبّ حظّو كبير
في بيت
وجنينه
وسنديانه
ومطرح ما في نقده للعصافير
العصفور عم ينقد مع التّاني
والشّعر نازل بالحلا تصوير
وريشه بِهالألوان غرقانه
هونيك في زهره
عا حفّة بير
بتصفرّ
ما بتقول عطشانه
بتعرف يابيّي بحبّ تقعدني بحضنك وارجع اقرالك هالقصيده يللي بحبها كتير ..وقلّك ياي شوبحبّك:
شال ضلع
وصار يتسلّى
يعطف
يحبّ
يحنّ
يتجلّى
ومن بعد ما تجلّى
انتبه واهتمّ
وكوّن مرا
اخت وحبيبه وام
ياي شو بيحبّنا الله
بدّك كمان سمّعك لهالشاعر ؟ مبيّن حبّيتو وهوّي بيحبّك كتير
اسماع شو بيقول:
الناس
هنّي كياس عم تمشي
وبهالكياس تراب
وفي إيد عم بترشّنا
كمشه ورا كمشه
ومنطير
مع هالريح متل كياس
قصايدو يابيّي بتذكّرني ب(تراب وأسامي ) مطرح ماكنت تاخدنا بقصايدك بقلب الزمن .. تفتح بواب بعيده وتمشّينا بجنينات الجنّيّات السمر والشقر ياألله يابيّي أيمتى بدّك تجي بقى .. أنا عازمتكن إنت وهالشاعر الحلو متلك ع كزدوره عطرقات القمر بدي غنيلك قصيدتك:
شو قولكن ؟
من وين هالعطر ال عبق ؟
أيّا عطر؟
أيّا ورد ؟
أيّا حبق ؟
وهون ما كنتي
وكلّ العطر إنتي
يمكن يكون بْشي فكر إسمك مرق
وبدّي غنّيلو قصيدتو:
حروف إسمك بالدّني
وإسمي
طلعو عدد
مابيقبل القسْمه
وأشواقنا ساعة رمل
بتضل
مره بتسكب
جسمك بروحي
ومره
بتسكب روحك بجسمي
بعرف حرقصتك وصرت بدّك تعرف مينو هالشاعر
هالشاعر يابيّي كان يسهر معك ع جبل السايح فوق ضيعتو مرمريتا تذكّرتو ؟
وكان بالعلامه الله يسهر معكون
“ كتابو زغير "ّ بيتين وتنّور " بس كبير متل كتابك "غربة الرسّام"
ههه.. لاء مش ميّت هالشاعر طيّب ومتلك مابيموت
“عمرو متل عمرك "سنين وثواني
يابيّي لاتواخذني لازم روح شوف مين عم ينقر عالشبّاك
..
آخ هيدا هوّي إياد قحْوش
 |
| الشاعر الصديق اياد قحوش |
كتاب "بيتين وتنّور " موجود بالمكتبه البولسيّه بجونيه ع هالرقم (70680289) .. ريع الكتاب رح يكون لمساعدة المهجّرين السوريّين
3 comments:
يابنت نبيل الشاعر المابيموت .. بس إقرالك بحس بطعمة السما .. شو حكيك نبيد وشعر بيّك قربان ؟
وشكرا لعرّاب شعرا الغربه حبيبنا الشاعر الكبير متل لبنان شربل بعيني .
"نهله" السما تبعتلِك
القوِّه
كلِّك محبِّه
ولطف ومْروِّه
عِصام إسمي
ابن بشمزِّين
بيِّك عرفتو
من كْوام سنين
وحياة عينيكي
كنت عدُّو خَيّ
بقلوب كلّ العارفينو
حَيّ
ما مات
هلّي مات مش هوِّي.
شكرًا استاذ شربل وبشكر محبة ووفا الأستاذ عصام ملكي
إرسال تعليق