ضبّو الشتي ...تياب الربيع تفصّلو!
وحملت قلبي وصّرة الحلم الحلو
اسأل ...وغابات البنفسج يسألو:
وين الربيع ووين ها الشرق البديع؟
ل عم يرحلو وعم يوصلو... ما تبدّلو!
بعدن ع كرسي مخلّعه بيتقاتلو
وبعدن الناس الأبريا بيتبهدلو....
شفت السنونو بس ما شفت الربيع!
***************
ع العرس عزمونا ورحنا: واجبات!
لقينا الخبز ناشف ع كل الطاولات......
وعريّف شو حريّف:
يلعب بها لكلمات
ويرشّ سمسم ل الفضائيات...
وتزلغط النغمات:
يا رايحين عا حلب
حبّي معاكن راح،
يا محمّلين العنب
تحت العنب في سلاح!
***************
..وكانت الغربه صاج احمر
والرغيف:
خيال اسود ع الرصيف!
وتقعد لحالك
تاكل خيالك،
وتفرّق فتافيت بالك
عا عصافير الخريف....
وخبز الحكي ناشف ما بيشبّع ضعيف!
وبتمرق الايام ما بتحسّ كيف....
**********
و زوّارنا بديارنا، أحبارنا وثوّارنا:
وجوهن جديده، والخبار عتاق!
مش عم تلحّق نارنا
بيروح عاشق وبيجي مشتاق...
ونحنا قلب ابيض وهنّي غماق!
حفلات وعزايم،
كل ليله ليلة الدايم؛
اللّه ع ايام الزغر
ورغيف ع شقفة حجر...
ويقلّهن: هو هنّ!
بيّي...ويجي لعنّا القمر
يشرب عرق ويجنّ!
..وقلبي قمر مجنون بعدو بيسهر وبيحنّ!
****************
فزعان يا اختي السنونو ع الربيع
ب هالحراش يضيع،
ويتعب الراعي
والضبع يرعى القطيع.....
يحكم وياخد راحتو
ويدبح الشعر ب ساحتو
ونبيع ارض الحلم، حلم الارض
في سوق الخليع!
في أمّ عم تعجن صلا
وعيونها تنّور،
طالع ع بالي اسألا:
عندك خبز ناشف ل ها لعصفور؟
**************************
سدني – استراليا
آذار 2012
0 comments:
إرسال تعليق