الله
الخلق هالأرض
شافا متل حجره
عم تقلب بهالكون .. قلبه بعد قلبه
وحتى ما هيي تدوخ
شكّا بجذع شجره
وتحتا قعد.. يرتاح
وكانت الدلبه
**
الدلبه
ع خصرا الريح
مربوطه
شال
القمر عالشال ..غطّ ونام
براس الدني عرزال .. محطوطه
من تحت باطو
بتمرق الأيام
و شو الدهر حدّا
طفل
دحبى.. قطف ورقه
وخرطش ضحكتو للشام
**
هي دلبة التاريخ
ورقاتا
حكايات ختياره بعتم كانون
مجد السما
تربى ع ديّاتا
وبتهزّ حتى تنيّمو الغصون
هيدي وطن
للشمس
قصر الصوت
البيدقّ موسيقى الأبد
قونه .. بعنق الجنون
لازم تنعبد
متل الشعر
فايض ب جنّ العاصفه .. ومسكون
**
الدلبه
عروس الكون
الضو .. إلها بينغزل فستان
مافي ملك .. إلاّ ومرق من هون
و حوّش غصونا
للعرش تيجان
شو عاليي الدلبه
عَلَم
غطّت عليها حْمامة الطوفان
شو فايتي بالأرض
بطن الأرض
مكمّش فروع شلوشها ومليان
**
الدلبه عمر
منمرّ حدّا .. جيل يلحق جيل
ومنروح .. لكن باقيه
ومين فيه يشطب حرف بالإنجيل
وبتضلّ .. متل الأم
ع ولادا
تغطّي الولاد بشرشف تراتيل
الدلبه
أسد .. رابض ع كتف المجد
وشواربو
بيلبقلن التفتيل
* *
عن السايح
0 comments:
إرسال تعليق