أجمل حاجه انا حاسس بيها
إنَّ انا مصري بجدّ يا ناس
أوِّل مرَّه بشوف معانيها
فخر معطَّر بالإحساس
معقول بعد الكبت دا كلُّه
واللي يخاف من صورته وظلُّه
يتكلِّم من غير ما يخاف
معقول شمس الحقِّ تبان لي
وتبان للِّي عشقها تملِّي
واتمنَّى انِّ يشوفها وشاف
أجمل حاجه تلاقي خلودك
بعد سنين دابت ف. صمودك
اتحقَّق بعلو الصُّوت
صوت من قلبك من غير خوف
ف.ساعتها هتلاقي ألوف
بتضحي ولا تخاف م. الموت
أجمل شيء بدِّد أحزاني
إنَّ ألاقي شباب بيعاني
واقف ف. التَّحرير بيكبَّر
شاف الحلم فإنُّه يجاهد
ويحرك ف.جبال بتعاند
واتهدِّت والحلم اتحرر
أجمل ثوره كانت ف. يناير
خلّت عقل الظَّالم حاير
يعمل إيه ف. طوفان الحق
إتعلّمِنا نقولها صراحه
للحقَّاني معاك وبراحه
والظَّالم مفيهاش غير لأ
0 comments:
إرسال تعليق