زي زمان/ ايمان حجازي

ولسة زى زمان لسة قلبها الطيب بيحلم بالأمان
لسة بترسم ع صفحة الكراس وردة وقلب وطريق أخضر
وبنوتة تعزف ع الكمان
ولسة بتقول بكرة جاى بالخير كمان وكمان
ولسة رغم الحزن المخيم ع الشبابيك
ولسة رغم الألم والفراق والدمع المتحجر
لسة بتقول بكرة جاى يغسل حزننا يطبب جرحنا
ولسة ساكنة عيونها بسمة ورى كل دمعة
تحلم بفجر بشمس ببكرة عاشق نظرة عينيها يبوس تراب رجليها يمسح بإيده دموعها يهون المشوار عليها
ولسة زى زمان شايفة ع البعد الحلم حقيقة
شايفاه كلمة ونظرة جريئة
شايفاه طوق نجاة لعمر غرقان تعبان م دوامة الحياة
ولسة زى زمان يا قلبى بتعزف ع أوتار عمرى ألحانك
وصوت الناى الحزين يصحى أوهامك
ونسمع دعا الكروان
الملك لك لك لك يا صاحب الملك
والشكوى م الألم منشالة ليك ولا يعلمها إلاك ولا يداوى آلام القلب إلا هواك
يارب موجود ف علاك ................. سبحانك
مالك وشافى وقادر تبدل الأحزان وتزرع الخير ف البوار وتملى الصحرا عمار
ولسة زى زمان لما يضيق الحال نرفع أكف الضراعة لمقدر الأقدار
ولسة زى زمان العقل والقلب مليان بالأمان والإيمان
ولسة الرب موجود ف كل مكان
ولسة زى زمان بنقول بكرة جاى يغسل عنا الأحزان
راجع بالأمل بالحب بالأمان
قرب يا بكرة وتعالى
تعب القلب م الشوق والإنتظار
ولسة زى زمان بتقول لبكرة تعالى هدى الشوق وطفى النار وريح الحيرة م الأفكار

CONVERSATION

0 comments: