صبحيـــة شاميــــــة/ ايمان الدرع

ـــــ ألووو..كيفك أم سعيد ؟؟!!
ــــ منيحة تقبريني، كيفك أنت ؟؟!!
ـــ تمام الحمد لله طمنيني عنك ؟؟!!
ــ أنا بخير من الله، ومن العبد مالي حظ..
ــ له له له ..ليش خير ان شا الله؟؟!!
ـــ مهزوز بدني من كنتي، حردتْ وراحت لعند أهلها، تتحورق، إن شا الله ..قال شو ؟! بدها بيت لحالها، لك منين المعتر بدو يستأجر بيت؟! ومشَحْوَر مو ملاقي شغل.؟
ـــ يا لطيف على كناين ها الأيام؟ شو ما عندن صبر..بدن كلشي عا الجاهز.
ـــ اييييييه يشوفونا شو صبرنا وقت كنا قدهن ...لك دخلك..شو صار ببنت عمتك / أم سمير/ ؟؟!! رجعها جوزها بعد الطلاق ؟؟!!
ــ يييييييي قال رجعها، أي طقها جوازة من تاني يوم...والخانم راسها وألف سيف ،قال فشر ترجع على ضرة.
ـــ اي والله الحق معها، الضرة مرة..بس هيي كمان نكدية، وما بتنطاق، ووشها ما بيضحك لرغيف السخن.
ــــ ستي ما علينا..دخلك ان شالله صهرك / أبو هشام / طلع من المشفى ؟؟!!
ـــ ولي على قلبي عليكي يا أختي..منين بدك تلاقيها واللا منين؟؟!! والله دمعتها ماعم تنشف ليل، نهار، أختي مصابها مو قليل، راحلها بيتين، وسيارة، ورجعت عا الحديدة، وجوزها من وقتها أجتو الجلطة على أثرها من زعلو، وحياة الله ما عم تسمعي شي يسرك، تقولي عين وطرقتنا بها البلد ياااا لطيف.
أي صحي بدي أسألك!!! وصلوا اولاد أيمن على مقدونيا!! كانوا علقانين باليونان..وين صاروا ؟؟!!
ـــ يي سكتي سكتي..مو طلع المهرب كذاب، وابن حرام ..... الله لا يوفقو..ودفع أبوهم اللي فوقه واللي تحته..ليبعتلن مبلغ تاني حتى يكملوا على ألمانيا.
ـــ بعرف عا السويد ؟! 
ـــ لك لااا ..قال السويد تعبّتْ سوريين، وعم يتأخروا بالإقامة
ـــ ستي ان شا الله يوصلوا بالسلامة..الله يحميهن هنه وكل ها الشباب الهي..يعليي شو تمرمطوا..وتعتّروا..جوّا البلد، وبرّه..الله يفرّج ياااااا رب.
ـــــ ولي شو ها الاصوات من عندك ..كأنو فيه رش رصاص ؟؟!!
ـــ لك اي لا تخافي .. هدا تشييع شهيد..الله يصبر أهلو..والله شب يي على قامتي ما بتسخي ترميه بوردة...حسبي الله ونعم الوكيل..ياااااارب ترحمنا،وتصبر قلب الأمهات.. وتحفظ شبابنا.. والله تعبوا..
لك أنت في عندك ضجة أولاد ما عدت سمعتك..ألو ..ألو..
ـــ لك روح أنت وياه على أرض ديار لحظة..لحظة..
هدول أحفادي، عم يلعبواا يقبروني..frown emoticon لعبة عسكر، ومسلحين)، ونازلين ببعضن خبط، شي عامل حالو مات، وشي عم يزحف، وينيشن، ونافش شعرو، متل الإنسان الحجري..لك يا للا روحوااااا...
ــــ اي خير ان شاالله...طيب ..طيب ..قبل ما سكّر التليفون، فظاعة شو جدبة أنا ..؟؟!! فتحتلك تليفون خصوصي لأعزمك على عرس بنتي..امبارح خلصت امتحان الدورة التانية..لفحص البكالوريا..وبعد جمعة عرسها..بصالة / قصر الملكات: من الساعة 3 لل7..الجمعة الجاية، أوعي ما تجي أنت والمحروسة...والله بزعل..
ـــ ان شا الله بيصير خير..والله بحاول..لأني عاملة ورشة تصليحات بالبيت، وعم دهن غرفة القعدة، وغرفة الاولاد..قبل ما يجي العيد..والله البيت لبره..وابني عم يدهن بايدو..هلك يا عمري..
ـــ بدك تعملي جهدك..لك هي فروووحة معقولة ما تحضري عرسها؟!
ـــ خلص والله لأعمل كل جهدي..ووين راح تساوي شعرك؟؟!! 
ـــ والله بصالون الحسناء..مقصها كاوي..بس والله غير..والحفلات طاعت الها
ـــ بالهنا ان شا الله
وقفي..وقفي شوي في عجقة تحت شباكي..تكة وبرجعلك
ايي هاد الحجي / أبو معتز/ ومرتو..رجعوا من أمريكا..كانوا عند ابنهم، قال ما حسنوا يقعدوا برات البلد..وطول الوقت مقضيينها نواحة..وبكي..لحد ما قطعلن ابنهم تذكرة وبعتهم.ونادرة على قلبها المرة..أول ما توصل ..تبوس تراب الشام.
ـــ اي الحمد لله على سلامتهن..والله يا أختي ما في متل ريحة بلادنا..رغم كل شي صار..الله يحميها..ويردّلها الأمن، والأمان..الشام شامة ولك أختي..وبعمرها ما بتنضام........لك اي ما قبل ما تسكري..ولك ضرسانة شو بتحطي لحشوة اليالنجي..والله طعمته بتجنن ..من وقت ما عزمتينا آخر مرة .. بدي أسألك..
بسرعة قبل ما تقطع الكهربا، والمي.. ..بدي لحق الغسيل..
ـــ هاد ياستي ..بتجيبي ............
ومضت ساعات النهار، وعتّم الليل....ونعستْ السهريّة..وما خلص الحكي بين السوريين..وعم يحتار الكون بالشعب السوري..ليش صامد لهلأ..لك هووووون سوريا..فخامة الاسم تكفي..ويسعد صبااااااااحك يا شاااااااااااام.

CONVERSATION

0 comments: